თანამედროვე სამყაროში არქიტექტურა და დიზაინი ბევრად მეტია, ვიდრე სივრცის ლამაზ გარემოდ ტრანსფორმაცია – ეს არის საცხოვრებელი, კომერციული თუ სოციალური ობიექტების ფუნქციურ და შთამაგონებელ ადგილად ქცევა – როცა დიზაინი არა მხოლოდ ესთეტიკურობას, არამედ მასში მყოფი ადამიანების განწყობას, კომფორტს და ყოველდღიურ გამოცდილებას განსაზღვრავს.
„საუბრები დიზაინზე“ მულტიბრენდული შოურუმის – მოზაიკსის კიდევ ერთი წამოწყებაა, რომელიც არქიტექტორ-დიზაინერების სამყაროდან დაგვანახებს დიზაინის სფეროს. ქვეყნის წამყვანი დიზაინერები გაგვიზიარებენ თავიანთ ხედვებსა და გამოცდილებას, რისი დახმარებითაც დღემდე აქტიურად ქმნიან უნიკალურ სივრცეებს.
ერთად აღმოვაჩენთ, როგორ ერწყმის ფუნქციურობა ესთეტიკას, როგორ იქმნება გარემო, სადაც ცხოვრება კიდევ უფრო შთამაგონებელი და ჰარმონიულია.
პირველი სტუმარი კომპანია ფორტისის დამფუძნებელი და დირექტორი მეგი დევაძეა.
მეგი გვიამბეთ, როდის და რატომ დაინტერესდით ინტერიერის დიზაინით?
ხელოვნება ბავშვობიდანვე მიყვარდა ვამჩნევდი, რომ სივრცეს განსხვავებულად აღვიქვამდი — ვხატავდი, ვქმნიდი ნამუშევრებს და ყოველთვის ვეძებდი გზას, როგორ გამეხადა გარემო უფრო საინტერესო და კომფორტული. სამხატვრო აკადემიაში ჩაბარების შემდეგ არქიტექტურამ და ინტერიერის დიზაინმა ჩემს ცხოვრებაში განსაკუთრებული ადგილი დაიკავა. პროფესიონალად ჩამოყალიბების გზა კი განსაკუთრებით საპასუხისმგებლო ეტაპზე დაიწყო — დაახლოებით 24 წლის ასაკში, როცა 3 ბავშვის დედა ვიყავი და ყველაფრის დამოუკიდებლად კეთება მომიწია. ეს იყო გამოწვევა, რომელმაც მე არა მხოლოდ როგორც დედა, არამედ როგორც დიზაინერი და არქიტექტორი ჩამომაყალიბა. დღეს ჩემი მიზანია, ეს გამოცდილება გამოვიყენო, რათა ადამიანებს ისეთი სივრცეები შევუქმნა, რომლებიც არამხოლოდ ლამაზია, არამედ მათ ცხოვრებასაც უკეთესს ხდის.
რამ იქონია ყველაზე დიდი გავლენა თქვენს დიზაინერულ ხედვაზე?
ჩემი დიზაინერული ხედვის ჩამოყალიბება არ ყოფილა ერთი კონკრეტული მოვლენა — ეს იყო ხანგრძლივი და ეტაპობრივი პროცესი. თავდაპირველად, სხვა დიზაინერებისა და არქიტექტორების ნამუშევრებზე დაკვირვება მნიშვნელოვანი წყარო გახდა. დაკვირვება არამხოლოდ ინსპირაციის მიღებაში დამეხმარა, არამედ მასწავლა, როგორ დამენახა დეტალები, ფერები და კომპოზიცია ახალი თვალით. დიზაინერული განვითარება ჩემთვის მუდმივი მუშაობის, კვლევისა და პრაქტიკის შედეგია. წლიდან წლამდე ვხვდებოდი, როგორ იხვეწებოდა ჩემი ხედვა — ყოველ პროექტთან ერთად ვსწავლობდი ახალ მიდგომებს, ვცდილობდი თანამედროვე ტენდენციებს ავყოლოდი და ამ პროცესში საკუთარი სტილი დამეხვეწა.
ვფიქრობ, პროფესიონალიზმი არასოდეს არის დასასრული — ეს უწყვეტი სწავლა და განვითარებაა. ჩემი 20 წლიანი გამოცდილება ამის ნათელი მაგალითია. სწორედ ამ შეუჩერებელი ზრდისა და ცვლილების მიღების სურვილი მაძლევს საშუალებას, დღევანდელ ტრენდებს დავამთხვიო ჩემი მუშაობა და ყოველთვის ვეცადო საუკეთესო შედეგის მიღწევას.
როგორ მოქმედებს თქვენი პერსონალური სტილი და გემოვნება თქვენს პროექტებზე?
ჩემთვის, როგორც დიზაინერისა და არქიტექტორისთვის, უმთავრესი პრიორიტეტი დამკვეთის ხედვა და სურვილებია.ჩვენი პროფესიონალიზმიდან გამომდინარე, ყოველთვის ვთავაზობთ ახალ იდეებს, სტილისტურ გადაწყვეტებსა და დიზაინის ელემენტებს, რომლებიც პროექტს კიდევ უფრო ამდიდრებს. ეს ბალანსი — დამკვეთის სურვილების გათვალისწინება და ჩვენი გამოცდილების გამოყენება — გვაძლევს საშუალებას შევქმნათ პროექტები, რომლებიც არა მხოლოდ ვიზუალურად მიმზიდველია,
არამედ პრაქტიკულიც. საბოლოო შედეგად კი ვიღებთ კმაყოფილ მომხმარებლებსა და ისეთი სივრცეებს, რომლებიც ფუნქციურობასთან ერთად ესთეტიკურ ჰარმონიასაც ინარჩუნებს.
როგორ გამოიყურება დიზაინერის ერთი სტანდარტული სამუშაო დღე?
დიზაინერის ერთი სტანდარტული სამუშაო დღე ყოველთვის დინამიკურია და მრავალფეროვანი. დილის დაწყება ჩემთვის აუცილებელია მშვიდი განტვირთვით — ეს საშუალებას მაძლევს განვიმუხტო, მოვახდინო ფოკუსირება და დღის გეგმები სწორად დავალაგო. სამუშაო დღის დასაწყისში გუნდის წევრებთან კომუნიკაციას განსაკუთრებული მნიშვნელობა აქვს. ვგეგმავთ მიმდინარე პროექტების ეტაპებს, ვარჩევთ პრიორიტეტებს და ვადგენთ სამუშაოს თანმიმდევრობას. ეს პროცესი მნიშვნელოვანია, რადგან პროექტები ხშირად სხვადასხვა სტადიაზეა — ზოგი იდეის ჩამოყალიბების ეტაპზე, ზოგი კი უკვე რეალიზაციის პროცესში.
დღის განმავლობაში ვმუშაობ ესკიზებზე, ვიზუალიზაციებზე, მასალების შერჩევაზე და ტექნიკური დეტალების დახვეწაზე. თითოეულ პროექტს ინდივიდუალური მიდგომა სჭირდება, ამიტომ დროის განაწილება და ფოკუსირება გადამწყვეტია. სამუშაო დღის ბოლოს კი ყოველთვის ვაფასებ შესრულებულ დავალებებს და ვგეგმავ შემდეგი დღის ამოცანებს, რათა თითოეული პროექტი მაქსიმალურად გამართული და სრულყოფილი იყოს.
დიზაინერის დღე შესაძლოა ბევრისთვის არასტანდარტულად ჩანდეს, თუმცა ამ მუდმივ ცვლილებებსა და გამოწვევებშია სწორედ ის ენერგია, რაც ამ პროფესიას ასე საინტერესოსა და მიმზიდველს ხდის.
რა არის თქვენი სამუშაო პროცესის ყველაზე საინტერესო და ყველაზე რთული ნაწილი?
ჩემთვის სამუშაო პროცესის ყოველ ეტაპს თავისი გულწრფელი ინტერესი და სიამოვნება მოაქვს. თითოეული პროექტი ჩემთვის ახალი გამოწვევაა, რაც მუდმივად ინსპირაციას და ენერგიას მაძლევს. სამუშაო დღე შეიძლება დატვირთული იყოს და ხშირად დამღლელიც, მაგრამ ამაში ყოველთვის ვპოულობ სიამოვნებას, რადგან დიზაინი ჩემთვის არა მხოლოდ პროფესია, არამედ ხელოვნებაა. თუმცა, ყველაზე რთული ნაწილი მაინც დამკვეთთან პირველი შეხვედრებია. ეს არის ეტაპი, როდესაც ჩვენ უნდა შევძლოთ მათი სურვილების და მოთხოვნების მაქსიმალურად ზუსტი გაგება. ეს პროცესი ძალიან საპასუხისმგებლოა, რადგან ზუსტად ამაზე იქნება აგებული მთელი პროექტის სტრუქტურა. იდეალური დიზაინის შექმნა შესაძლებელი მხოლოდ მაშინაა, როცა ჩვენ შევძლებთ მათი საჭიროებები, სურვილები და მოლოდინები სწორად დავუკავშიროთ ჩვენს პროფესიონალიზმს. ზუსტად ამიტომ, თუ ამ პირველ შეხვედრაში შევძლებთ სწორად აღვიქვათ კლიენტის მოთხოვნები, შემდეგი ნაბიჯები უკვე გაცილებით მარტივი და ჰარმონიული იქნება.
როგორ ეძებთ და პოულობთ ინსპირაციას ახალ პროექტებზე მუშაობისას?
ახალი პროექტების ინსპირაციის მოსაძებნად, ჩემთვის ერთ-ერთი მთავარი რესურსი პინტერესტია. ეს პლატფორმა გთავაზობთ მრავალფეროვან ვიზუალებს და იდეებს, რაც დიდად უწყობს ხელს თითოეული დიზაინის უნიკალური და თანამედროვე გადაწყვეტის შექმნას. თუმცა, პინტერესტი მხოლოდ ერთი რესურსია. ინსპირაცია ხშირად მოდის რეალური სივრცეებიდან, ბუნებიდან, თანამედროვე არქიტექტურისა და ინტერიერის დიზაინის ტრენდებიდან და სხვა ხელოვნების ფორმებიდან. ჩვენ, როგორც დიზაინერები და არქიტექტორები, მუდმივად ვეძებთ ახალ სტილსა და ტენდენციებს, რათა პროექტებში გამოვიყენოთ ის, რაც ჯერ კიდევ არ არის მასშტაბური, და შევქმნათ რაღაც განსხვავებული და განსაკუთრებული.
რა არის ყველაზე დამაინტრიგებელი ტენდენცია, რომელიც ახლა დიზაინში გაჩნდა?
დღეს ერთ-ერთი ყველაზე საინტერესო ტენდენცია არის მიტოვებული და უძველესი ადგილების რენოვაცია. ეს ტენდენცია ამჟამად ინტერესს იწვევს და განსაკუთრებით აქტუალური გახდა, რადგან უფრო და უფრო მეტი ადამიანი ეძებს გზებს, რომ ისტორია, ტრადიციები და თანამედროვეობა ერთმანეთში გააერთიანოს. რენოვაციის პროცესში შენარჩუნება ხდება ავთენტურობის, თუმცა მოდერნიზებული დიზაინით და ტექნოლოგიებით. იდეა მდგომარეობს იმაში, რომ ძველ შენობებში კვლავ აღმოცენდეს ახალი სიცოცხლე და თანამედროვე ცხოვრება შევიტანოთ იმ ადგილებში, რომლებიც ისტორიულ მნიშვნელობას ატარებს.
როგორ ფიქრობთ, რა უნდა იცოდეს ყველა ადამიანმა სახლის მოწყობისას?
სახლის მოწყობისას ყველაზე მნიშვნელოვანია, რომ ადამიანები ორი ძირითადი ასპექტის გათვალისწინებით მოეკიდონ სივრცეს: კომფორტი და ფუნქციონალურობა.
ასევე, მნიშვნელოვანია, რომ ყოველი ოთახი ემსახურებოდეს კონკრეტულ მიზანს. მაგალითად, საცხოვრებელი სივრცე უნდა იყოს ისეთი, რომ ადამიანს ემოციურადაც შეუქმნას სასიამოვნო ატმოსფერო და სწორი მუხტი. სჯობს გამოვიყენოთ ისეთი სტილები და ელემენტები, რომლებიც არა მხოლოდ ტენდენციურია, არამედ ჩვენთვის, პიროვნულად, სასიამოვნო და ფუნქციონალური იქნება.
და ბოლოს, ყოველთვის უნდა გვახსოვდეს, რომ სახლი უნდა იყოს ჩვენი პიროვნების ავთენტური გამოხატულება. ეს სივრცე უნდა ასახავდეს ჩვენს გემოვნებას, საჭიროებებსა და ცხოვრების სტილს, რათა ყოველდღიურობა უფრო კომფორტული და საინტერესო გავხადოთ.
ნივთი, რომელიც სულ თან გაქვთ?
როგორც დიზაინერს, რომელიც მუდმივად მუშაობს სხვადასხვა ობიექტებზე, ჩემი საყვარელი ნივთი, რომელიც სულ თან დამაქვს, არ იქნება თქვენთვის გასაკვირი, რომ მეტრიანი და პატარა ლაზერია. ეს ინსტრუმენტი ჩემთვის კრიტიკულად მნიშვნელოვანია, რადგან დამეხმარება ზუსტად მოვინიშნო სივრცეების პროპორციები, განლაგება და გავაკეთო საჭირო კორექტირებები, რათა მივაღწიო იდეალურ შედეგს. მიუხედავად იმისა, რომ თანამედროვე ტექნოლოგიები და პროგრამები მნიშვნელოვნად გვიადვილებს სამუშაოს, მეტრიანი მაინც რჩება ჩემთვის ერთ-ერთ ყველაზე საჭირო და აუცილებელ ხელსაწყოდ, რომელსაც ყოველდღიურად ვიყენებ.
რომ შეგეძლოთ, ერთი ქალაქი ან სივრცე სრულიად თავიდან დაგეგმოთ, რომელი იქნებოდა ის?
დიდი ხანია მაქვს იდეა ბიზნეს ქალაქის შექმნის შესახებ. ვგრძნობ, რომ საქართველოში, განსაკუთრებით თბილისთან ახლოს, არსებობს შანსი გადავდგათ ნაბიჯი ისეთ კონცეფციაზე, რომელიც თანამედროვე საჭიროებებს, ტექნოლოგიურ შესაძლებლობებს და ვიზუალურ სტილებს მოიცავს. ეს არ იქნებოდა მხოლოდ ბიზნეს ცენტრი, არამედ სივრცე, რომელიც მორგებულია ადამიანების ყოველდღიურ ცხოვრებზე, ახალი ტექნოლოგიებითა და ეკოლოგიურად სუფთა მიდგომებით. მინდა, რომ ამ ქალაქში განახლებული არქიტექტურით, ინოვაციური ინტერიერებითა და დახვეწილი ურბანული დიზაინით შევქმნა ისეთი გარემო, სადაც სამუშაო და კომფორტი ერთმანეთს იდეალურად ერწყმის, სადაც ადამიანი თავს ნამდვილად სიმყუდროვეში და პროდუქტიულად გრძნობს.
რომელი ჩვევაა თქვენი აზრით ყველაზე მნიშვნელოვანი წარმატებული კარიერისთვის?
ჩვევები, რომლებიც კარიერისთვის ყველაზე მნიშვნელოვანი მგონია, არის მუდმივი ძიება, დაუღალავი შრომა და მიზნისკენ წასვლა. ეს არის გზა, რომელიც არასოდეს წყდება. ჩემი რჩევა ყველასთვის იქნებოდა – თუ გინდა წარმატება, ყოველთვის გაიწერე შენი მიზნები. ყოველდღე შეგიძლია ამ მიზნების ჩამოწერა, რადგან ეს არა მხოლოდ დაგეხმარება მათ სწორი მიმართულებით მიღწევაში, არამედ გახსნის გონებას ახალი იდეების და გამოწვევების წინაშე. პირადად მე, როცა ბლოკნოტში ვწერ, მხოლოდ სიტყვები არ რჩება იქ, არამედ რეალური მიზნები, რომლებსაც ყოველდღიურად ვუახლოვდები. ეს მიდგომა გეხმარება საკუთარი თავის უფრო მკაფიოდ და დეტალურად შეფასებაში, რაც მიმართულებებს გაძლევს კარიერის გზაზე.
კითხვა, რომელსაც თქვენს კოლეგა დიზაინერს დაუტოვებთ …
როგორი იქნებოდა შენი ოცნების სახლი და რატომ?
