ამჯერად მოზაიკსის რუბრიკის “საუბრები დიზაინზე”-ს სტუმრები არიან ინტერიერის დიზაინის სტუდიის „Due“-ს დამფუძნებლები: ლიკა ლასარეიშვილი და ცოტნე ანდრიაძე.
ლიკა, როგორ გახდით ინტერიერის დიზაინერი? გაიხსენეთ მომენტი, როცა მიხვდით, რომ ეს თქვენი საბოლოო პროფესიული არჩევანი იყო?
მახსოვს, ბავშვობაში დიდი ინტერესით ვუყურებდი გადაცემებს დიზაინზე, მიყვარდა ჩემი თოჯინებისთვის სახლების მოწყობა. ჩემს ბებიას ძალიან უყვარს მხატვრობა, ბავშვობაში ხშირად ერთად ვხატავდით ხოლმე, რამაც, ვფიქრობ, გარკვეულწილად იმოქმედა ჩემი შემოქმედებითი მხარის განვითარებასა და ხელოვნებისადმი სიყვარულზე. ჩავაბარე თბილისის სახელმწიფო სამხატვრო აკადემიაში, ინტერიერის დიზაინზე და შემდგომ განვაგრძე სწავლა მაგისტრატურაზე მილანში, ჩვენ სფეროში ერთ-ერთ წამყვან უნივერსიტეტ IED – ში. იტალიურმა გამოცდილებამ და მიღებულმა ცოდნამ სულ სხვა კუთხით დამანახა, შემაყვარა ჩემი პროფესია და კიდევ მეტად დამარწმუნა იმაში რომ ნამდვილად არ შევცდი პროფესიის არჩევაში.
ცოტნე თქვენს შემთხვევაში, როგორ გააკეთეთ არჩევანი?
ჩემთვის ამ პროფესიის არჩევის საფუძველი იყო ჩემი ძმა, რომელიც სამხატვრო აკადემიაში სწავლობდა, ხშირად მივდიოდი მასთან უნივერსიტეტში სწავლის დროს და ეს გარემო იმდენად მიმზიდველი აღმოჩნდა ჩემთვის, რომ სხვა სფეროზე აღარც მიფიქრია. ამის გარდა, გავიზარდე ოჯახში სადაც შემოქმედება დიდი დოზით იყო, შესაბამისად, მეც ბავშვობიდან აქტიურად ვხატავდი. კონკრეტულად ინტერიერის დიზაინით კი დავინტერესდი აკადემიაში სწავლის დროს, რადგან ვსწავლობდი სამრეწველო დიზაინის მიმართულებით, სადაც ხშირად ავეჯის დიზაინის შექმნა გვიწევდა, რაც დიდ სიამოვნებას მანიჭებდა. ავეჯის დიზაინის შექმნა ნელ-ნელა გადაიზარდა ინტერიერის დიზაინის შექმნაში.
ლიკა დიზაინი თქვენთვის უფრო პროფესიაა თუ ცხოვრების სტილი?
რა თქმა უნდა ორივეს შემთხვევაში ცხოვრების სტილია, რადგან ვაკეთებთ იმ საქმეს, რომელიც გვიყვარს. ინტერიერის დიზაინს, ჩვენი ცხოვრების უდიდესი ნაწილი უკავია, ამიტომ წარმოუდგენელია იყო წარმატებული ამ სფეროში თუ ამ პროფესიას შენი ცხოვრების სტილად არ აქცევ.
გაიხსენეთ პირველი პროექტი, რომელიც დამოუკიდებლად დაგეგმეთ და იყო თუ არა რაიმე გამოწვევა, რომლის დაძლევაც მოგიწიათ?
ლიკა: ჩემი პირველი დამოუკიდებელი პროექტი იყო ჩემი დის და მისი მეუღლის ბინა, სადაც სრულად ვიყავი ჩართული რემონტის პროცესში, მასალების შერჩევაში, ადგილობრივ საწარმოებთან კომუნიკაციაში, რაც ჩემთვის დიდი პასუხისმგებლობა და საკმაოდ საინტერესო გამოწვევა იყო. ძალიან ბევრ ტექნიკურ დეტალს ვსწავლობდი პროცესში. გამიმართლა რომ პირველი დამოუკიდებელი პროექტი ჩემი დის ბინა იყო, რადგან მეტად თამამი ვიყავი გადაწყვეტილებების მიღებასა და სირთულეების დაძლევაში.
ცოტნე: ძალიან საინტერესო იყო ჩემი პირველი პროექტის ისტორია, ეს იყო არც მეტი არც ნაკლები ლიკას და მისი ოჯახის ბინა. მე და ლიკა მაშინ ერთმანეთს არ ვიცნობდით. ლიკა იმ დროისთვის სტუდენტი იყო და მე უკვე ვმუშაობდი დიზაინერად ერთ-ერთ კომპანიაში, აღმოჩნდა ისე, რომ ამ კომპანიას უნდა ეწარმოებინა ავეჯი ლიკას სახლისთვის, რომლის დიზაინზე მუშაობა მე მხვდა წილად. ყველაფერმა საბედნიეროდ კარგად ჩაიარა.
ამ პროექტში ლიკასთან გადაკვეთა არ მქონია, რადგან მშობლებთან მქონდა კომუნიკაცია. წლების შემდგომ, როდესაც ლიკა გავიცანი ერთ-ერთ არქიტექტურულ კომპანიაში, მისი გვარის გაგებისთანავე გამახსენდა ჩემი პირველი პროექტი და აღმოჩნდა, რომ ჩემი დიზაინით შექმნილ სახლში ცხოვრობდა. ორივემ ბევრი ვიხალისეთ ამ ფაქტზე და ასე მხიარულად დაიწყო ჩვენი მეგობრობა. დღემდე ვხუმრობთ, რომ ჩვენი დიზაინ სტუდიის დუეს შექმნა ერთგვარი ბედისწერა იყო.
როგორია ინტერიერის დიზაინერის ყოველდღიურობაში პროექტზე მუშაობა? დროის უმეტესი ინსპირაციის წყაროს ძიებას ეთმობა თუ პროექტირების პროცესს?
ჩვენ შემთხვევაში დიზაინზე მუშაობა ინსპირაციის ძიებით – კონცეფციაზე მუშაობით იწყება, რის მიხედვითაც შემდგომ ვქმნით დიზაინს, რადგან ვფიქრობთ, ინტერიერი კონცეფციის გარეშე წარმოუდგენელია. პროექტირებისას ასევე შესაძლებელია კიდევ ბევრად უფრო საინტერესო იდეები მოვიდეს, რადგან უკეთ ეცნობი იმ კონკრეტულ სივრცეს და უღრმავდები დეტალებს. ეს პროცესი ერთგვარი პროექტის ძერწვაა, რაც გვაძლევს საშუალებას მივიღოთ ჩვენთვის სასურველი შედეგი.
როგორ უმკლავდებით იმ გამოწვევას, როცა თქვენი და დამკვეთის, შეხედულება ან გემოვნება თქვენს ხედვას არ ემთხვევა?
ეს პრობლემა დროთა განმავლობაში თავისით გადაიჭრა, რადგან დამკვეთები ძირითადად ჩვენი პროექტებიდან გამომდინარე გვირჩევენ, მოსწონთ ჩვენი ხედვა და გემოვნება, ამიტომ მსგავსი პრობლემის წინაშე აღარ ვდგავართ ხოლმე.
როგორ იწყებთ ახალ პროექტზე მუშაობას და რა არის to do list-ში ის პირველი Task-ი, რომელიც უცვლელია?
ახალ პროექტზე მუშაობის დასაწყებად, პირველ რიგში, ვიცნობთ დამკვეთს, გვაქვს ინტერვიუს სახის შეხვედრა, სადაც უკეთ ვეცნობით მათ სურვილებს, გემოვნებას, ხასიათს, რის მიხედვითაც ვიწყებთ დიზაინის კონცეფციაზე მუშაობას.
არის თუ არა რაიმე დამახასიათებელი ნიშანი, რომელიც თქვენს ყველა პროექტს აერთიანებს?
ძალიან ბევრისგან გვსმენია, რომ ჩვენი პროექტები ხასიათდება სიმყუდროვის შეგრძნებითა და ფერების ბალანსით. ვფიქრობთ, ეს ის შტრიხებია, რაც დუეს ნამუშევრებს აერთიანებს.
დაგვიხასიათეთ თქვენი პროექტები სამი სიტყვით?
ესთეტიკური, დაბალანსებული, ერგონომიული
როგორ იყენებთ ტექნოლოგიას თქვენი ხედვის რეალიზებისთვის?
დღევანდელ სამყაროში, ტექნოლოგიები, ინტერიერის დიზაინის შექმნისთვის უდიდეს როლს თამაშობენ. ვიყენებთ ვიზუალიზაციისთვის და ტექნიკური ნახაზებისთვის. ეს პროგრამები გვეხმარება შევქმნათ ესთეტიურად დახვეწილი და ტექნიკურად გამართული ნახაზები, ასევე, 3დ ვიზუალიზაციები, რაც დამკვეთს ეხმარება სივრცის მაქსიმალურად რეალურად აღქმაში.
როგორია თქვენი სამუშაო გარემო? – ეს არის მოწესრიგებული სივრცე თუ კრეატივისთვის უმეტესად დამახასიათებელი, ქაოსური?
ორივე საკმაოდ წესრიგის მოყვარულები ვართ, ამიტომ ჩვენი სამუშაო გარემო არასდროს არის ხოლმე ქაოტური. სულ ვცდილობთ პროექტზე მუშაობის პროცესიც ისეთივე მოწესრიგებული იყოს, როგორიც ჩვენი სამუშაო გარემოა.
არის თუ არა თქვენი პროექტების ინტერიერში “gilty pleasure“ ელემენტი?
ყოველთვის ვცდილობთ არ ავყვეთ ტრენდებს და ვაკეთოთ ისეთი დიზაინი, რომელიც დროს გაუძლებს. თუმცა, ახლა გვაქვს ჩვენი gilty pleasure ელემენტი ინტერიერში, პრიალა მასალები, რაც საკმაოდ ტრენდულია ახლა. თუმცა, რა თქმა უნდა, გააჩნია რა დოზით და როგორ იყენებს დიზაინერი მსგავს ტრენდებს, ვცდილობთ ბალანსი შევქმნათ ნებისმიერი მასალის გამოყენებისას.
რა არის ყველაზე დიდი გამოწვევა, რომელსაც სამუშაო პროცესში ხვდებით?
ხშირად დამკვეთს ურჩევნია, რომ საკუთარი ძალებით შეასრულოს სარემონტო სამუშაოები, რაც საკმაოდ ართულებს იმ შედეგის მიღწევას, რაც ჩვენ გვინდა რომ მივიღოთ. გამოუცდელი სარემონტო გუნდი, სამწუხაროდ, დიდი პრობლემაა ჩვენ სფეროში.
თქვენთვის ყველაზე დიდი ინსპირაციის წყაროა ….
ლიკა: ჩემთვის ყველაზე დიდი ინსპირაციაა მოგზაურობაა, რადგან ბევრი საინტერესო სივრცეების აღმოჩენით ვავითარებ ჩემს ხედვას.
ცოტნე: ჩემთვისაც მოგზაურობა ყველაზე დიდი ინსპირაციის წყაროა, ყოველი ახალი ქალაქის ნახვისას ახალი იდეებით ვბრუნდები.
როგორი იწყებთ ერთ ჩვეულებრივ სამუშაო დღეს?
ჩვენი სამუშაო დღე იწყება დილას 9 საათზე და აუცილებლად ყავით 😊
3 ნივთი, რომელიც მუდმივად თან გაქვთ?
სამი არ ვიცით, მაგრამ მობილური მთავარი ნივთია, რომელიც სულ გვჭირდება და თან დაგვაქვს, რადგან პროფესიიდან გამომდინარე ძალიან ბევრ ხალხთან გვაქვს კომუნიკაცია, ვიღებთ ხოლმე პროექტის მიმდინარე პროცესებს, განვიხილავთ ჩვენს გუნდთან პროექტის დეტალებს და ა.შ.
რომელ ქალაქში იხოვრებდით მხოლოდ იმიტომ, რომ მისი არქიტექტურა დასივრცეები შთაგაგონებთ?
ლიკა: კოპენჰაგენში და პარიზში, ძალიან მომწონს დანიური ბრენდების ესთეტიკა და პარიზის ხასიათი.
ცოტნე: მილანში და ბარსელონაში, მილანი იტალიური ბრენდების სიუხვის გამო და ბარსელონა საოცარი არქიტექტურის გამო.
ინტერიერის შექმნისას, რომელს ანიჭებთ უპირატესობას – ქაოსში ნაპოვნ იდეას თუ სტანდარტულ გეგმაზომიერ კონცეფციას?
გააჩნია პროექტს, შეიძლება თავდაპირველად თავში ქაოტურად ბევრი იდეა გიტრიალებდეს და შემდგომ დაბალანსდეს ან თავიდანვე დაიწყო ძალიან გააზრებული იდეებით და მიყვე გეგმაზომიერ კონცეფციას.
პროფესიული რჩევა მათთვის, ვინც ახლა იწყებს ამ სფეროში?
ხშირად ჩქარობენ დამწყები დიზაინერები პროფესიონალად ჩამოყალიბებას, სამწუხაროდ, რამდენიმე თვიანი კურსები არ არის საკმარისი, რომ ეს პროფესია შეისწავლონ სათანადოდ. ინტერიერის დიზაინი საკმაოდ კომპლექსურია და არ არის მარტივი, როგორიც ხშირ შემთხვევაში ჰგონიათ. თქვენი იდეები რეალობად რომ აქციოთ, ამისათვის ძალიან დიდი გამოცდილებაა საჭირო, ბევრი ტექნიკური დეტალის ცოდნა და ვიზუალური მასალის დალექვა თქვენს გონებაში, რასაც დრო სჭირდება. ამ პროფესიას, ვფიქრობთ, სიჩქარე არ უხდება. დამწყებ ინტერიერის დიზაინერებს ვურჩევდით, გაიარონ სტაჟირება გამოცდილ კომპანიებში, სადაც შეხება ექნებათ რეალურ პროექტებთან. ხშირად ვაწყდებით პრობლემას, როდესაც დიზაინერმა არ იცის დიზაინერული ბრენდები, არ იცის მათი პროდუქციის შესახებ, რაც ძალიან გვიკვირს, რადგან დღევანდელ დღეს მარტივია ინტერნეტში ამ ინფორმაციის მოძიება, აუცილებელია იცოდეს დიზაინერმა ვინ რას ქმნის, რომ მეტად დაეხვეწოს გემოვნება და ხედვა.
