ამჯერად ჩვენი რესპოდენტები N.S. KARIAULI-ს დამფუძნებლები, ინტერიერის დიზაინერები ნათია და სოფო კარიაულები არიან.
ნათია მოგვიყევით როდის დაინტერესდით დიზაინით და რა ასაკში მიიღეთ გადაწყვეტილება, რომ ცხოვრების ნაწილად გექციათ?
დიზაინით ბავშვობიდან ვარ გატაცებული, თოჯინების სახლებსა და ტანსაცმელს ვქმნიდი. დროთა განმავლობაში ეს გატაცება პროფესიად იქცა და ტანსაცმლის დიზაინერი გავხდი. თავდაპირველად ვმუშაობდი “მაკა ასათიანთან”, შემდეგ დამოუკიდებლად, მეგობრებთან ერთად სახელოსნო მქონდა. თუმცა გარკვეულ ეტაპზე ჩემი ყურადღება ინტერიერის დიზაინმა მიიპყრო. სფეროს შესწავლამ და მისმა მრავალფეროვნებამ იმდენად მომხიბლა და დამაინტერესა, რომ საქმიანობის პროფილიც შევცვალე. ტანსაცმელი ინტერიერმა ჩაანაცვლა და დღემდე დიდი ენთუზიაზმით გრძელდება. ყოველ დღე ვცდილობ მეტი ვისწავლო და აღმოვაჩინო, რადგან ინტერიერის დიზაინი, იმდენად დინამიკური და ამოუწურავი სფეროა, რომ მოდუნების შესაძლებლობას არ გაძლევს. ჩემს თითოეულ პროექტს განსაკუთრებული ყურადღებით ვუდგები, რადგან მიყვარს საქმე, რომელსაც ვაკეთებ.
როდის მიიღეთ კოლაბორაციის გადაწყვეტილება და როგორ ანაწილებთ პროექტებს?
ჩემი და სოფოს კოლაბორაცია სრულიად შემთხვევით შედგა. მიუხედავად იმისა, რომ ბიძაშვილები ვართ და ბავშვობაში ერთად ვიზრდებოდით, საქმიანობის კუთხით სულ რაღაც 6 წელია რაც გავერთიანდით. გემოვნებით ძალიან ვეწყობით ერთმანეთს და ხშირად ერთი და იგივე მუდბორდი გაგვიზიარებია ერთმანეთისთვის :)). პროექტის კონცეფციასა და იდეაზეც ერთად ვმუშაობთ და შემდეგ ვინაწილებთ ვალდებულებებს. საბოლოოდ ურთიერთშეთანხმებით კეთდება ყველა დეტალი.
სოფო თქვენს შემთხვევაში როგორ დაიწყო?
ჩემი პროფესიაც ტანსაცმლის დიზაინს უკავშირდება, მაგრამ ამ პროფესიით არასდროს მიმუშავია. 30 წლის ასაკში მივხვდი, რომ ინტერიერის დიზაინი ძალიან მაინტერესებს და გადავწყვიტე საკუთარი თავი ამ სფეროში გამომეცადა. ვისწავლე ხაზვა, სხვადასხვა პროგრამები, სფეროს პროფესიონალებისგან მივიღე რჩევები და საქმიანობაც აქტიურად დავიწყე. მოგვიანებით ჩემი და ნათიას კოლაბორაციაც შედგა N.S. KARIAULI სტუდიის სახით. დღემდე არაერთ წარმატებულ და დიდ პროექტზე ვიმუშავეთ.
ნათია არსებობს თუ არა სივრცე, რომელმაც შეცვალა თქვენი აღქმა დიზაინის მიმართ? როსანა ორლანდის გალერეა მილანში. როცა პირველად იქ მოვხვდი წარმოუდგენელი ემოცია მქონდა. უბრალო ნივთებისგან მსგავსი ხელოვნების ნიმუშების შექმნა თუ შესაძლებელი იყო ვერც წარმოვიდგენდი. ექსპოზიცია, მასალა, განათება… ყველაფერი განსხვავებული იყო და ნამდვილად წარუშლელი შთაბეჭდილება მოახდინა ჩემზე. რა ნივთს ან არქიტექტურულ დეტალს მიიჩნევთ ყველაზე დაუფასებლად?
არ მეგულება არქიტექტურაში დეტალი რომელიც დაუფასებელია, რადგან ყველაფერი ერთად ქმნის ჰარმონიას და იქ დაუფასებელი რომელიმე დეტალი არ შეიძლება იყოს.
რომელი ფერია თქვენი აზრით ყველაზე ძლიერი ემოციური დატვირთვის მქონე?
ფერები ცალკე ფილოსოფიაა. ყველა ადამიანი ინდივიდუალურია და თავისი ემოციური აღქმა აქვს ფერის. რაც ერთისთვის ჰარმონიულია შეიძლება მეორეს აღიზიანებდეს, ამ მიმართულებითაც საკმაოდ დიდი მუშაობა გვიწევს დიზაინერებს. თუმცა აღვნიშნავ, რომ ინტერიერში ძირითადად მაინც მშვიდ, ბუნების ფერებს ვიყენებთ – ფერადი აქცენტებით, რაც ინტერიერს უფრო საინტერესოს ხდის.
რომელი მასალაა თქვენი აზრით მომავლის დიზაინში ყველაზე მნიშვნელოვანი?
დღეს დიდი ყურადღება ექცევა ეკოლოგიურ და ბუნებრივ მასალებს, თუმცა ასევე ფართოდ გამოიყენება გადამუშავებული მასალისგან მიღებული საოცარი პროდუქტები. ეს სფერო ზოგადად ძალიან მალე იზრდება და ვითარდება ახალი ტექნოლოგიების დახმარებით, ამიტომ მგონია, რომ მომავალში ისეთი მასალა გაჩნდება, რაც ჯერ კიდევ არც ვიცით.
როგორ აისახება თქვენი პიროვნული სტილი თქვენს ნამუშევრებში?
ყოველთვის ვცდილობ ყველა ობიექტი ერთმანეთისგან განსხვავებული იყოს. ალბათ უფრო საზოგადო ინტერიერში შეიძლება ისახებოდეს საერთო დამახასიათებელი სტილი, თორემ კერძო ბინა იქნება თუ სახლი მაქსიმალურად ვცდილობთ მეპატრონის ინტერესები დავიცვათ. ერთი რასაც გამოვყოფ, ყოველთვის აღნიშნავენ, რომ თითოეული ინტერიერი სიმყუდროვით გამოირჩევა.
ნათია, გიზიარებთ წინა რესპონდენტის, მეგი დევაძის კითხვას: როგორი იქნებოდა თქვენი ოცნების სახლი და რატომ?
ალბათ კერძო სახლი დიდი ნათელი ფანჯრებით და საოცარი ზღვის ხედით. დიდი ტერასა ექნება, მაღალი ჭერი და მაღალი კარები. დაგეგმარებული იქნება სწორი ენერგეტიკული წესების მიხედვით, რასაც ახლა ვსწავლობ და აუცილებლად გამოვიყენებ ჩემ საქმიანობაში, რომ ჩემი (და ჩემი დამკვეთების) სახლი და გარემო იყოს ჰარმონიული, დაბალანსებული და წარმატების მომტანი.
სოფო თქვენ, როგორ წარმოგიდგენიათ თქვენი ოცნების სახლი და რატომ?
ჩემი ოცნების სახლი იქნებოდა არც თუ ისე დიდი, მზიანი, ნათელი და მშვიდი, სადაც ჩიტების ჭიკჭიკი და ფოთლების შრიალი გამაღვიძებდა. სახლში მთავარი სივრცე ჩემი სტუდია იქნებოდა, სადაც შევძლებდი განმარტოვებას და ხატვას..
რა ახდენს თქვენზე ყველაზე დიდ ზეგავლენას პროექტზე მუშაობისას — მოგზაურობა, ხელოვნება, ბუნება თუ სხვა რამ?
ხშირ შემთხვევაში მოგზაურობა, ახალი შთაბეჭდილებები, ბუნება, უცხო, ლამაზ ქუჩებში ხეტიალი და დადებითი ემოციების განცდა.. ამ ყველაფერს ერთად მოაქვს ახალი ძალები და ენერგია იყო მეტად შემოქმედებითი და შექმნა სილამაზე..
საოცნებო პროექტი, რომელსაც სიამოვნებით გააკეთებდით, თუ ყველა საჭირო რესურსი გექნებოდათ?
ამ ეტაპზე ჩემი საოცნებო პროექტი, ჩემი საკუთარი სახლია :).
რა არის ყველაზე დიდი გამოწვევა, რომელსაც სამუშაო პროცესში ხვდებით?
ყველა ახალი პროექტი ახალი გამოწვევაა.
რა არის ყველაზე უცნაური მოთხოვნა, რაც ოდესმე მიგიღიათ დამკვეთისგან?
რა უცნაურობაც არ უნდა იყოს, დამკვეთისგან ყველაფერი მისაღებია, როცა საქმე მის სახლს ეხება. განსაკუთრებული არაფერი მახსენდება.
ვის ანდობდით თქვენი სახლის ინტერიერის ხელახლა დაგეგმვას?
მხოლოდ ჩემს თავს :). ჩემზე კარგად არავინ იცის რა მინდა და რა მომწონს.
ფიქრობთ, როგორ შეიცვლება ინტერიერის დიზაინი და არქიტექტურა მომდევნო ათწლეულში?
ვფიქრობ, მეტად მინიმალისტური და ცივი გახდება, რაც ნაკლებად მომწონს.
როგორ ინარჩუნებთ ბალანსს კრეატიულობასა და პრაქტიკულობას შორის?
მარტივია ბალანსი, როდესაც ორივეზე ერთდროულად ფიქრობ და მათი გათვალისწინებით ქმნი დიზაინს.
